قبل ما تشتري البرفيوم تعالي هنا الاول

طبعا احنا كتير اوي بنحتار واحنا بنشتري برفيوم
دة ولا دة ؟؟
وساعات تشتري برفيوم وبعد ما تروحي ما يعجبكيش
وساعات وانتي في المحل مش بتبقي عارفة تشمي كويس
وتحسي ان كل الروايح اتلخبطت وكلهم زي بعض

طيب المفروض تعملي ايه ؟؟
البرفيوم الاول بتجربيه علي ايدك او قماشة او ورقة
زي مثلا لما بتروحي فيسزز وتحبي تشمي برفيوم معين
بتلاقي الراجل بيرشه في الهواء كدة ومعاه سترب كدة او شريط بيحركه في المكان الي رش فيه البرفيوم
ويديهولك تشميه
ودي فعلا احسن طريقة انك تجربي بيها البرفيومز
بعد ما شمتيه وعجبك برضه ما تتسرعيش
اخرجي من المحل ولفي شوية وكملي الشوبينج بتاعك
وشمي تاني بعد ساعتين مثلا
لو لاقيته ريحته لسة عاجباكي اشتريه
لو لاقيته ريحته غيرت او قلبت او انتي مش حاباها ماتشتريهوش

تاني حاجة شوفي انتي عايزة البرفيوم دة ليه ؟؟
فيه برفيومز شتوي شوية وتنفع بالليل وبرفيومز فريش كدة وخفيفة للصيف او الصبح
والبرفيومز الشتوي او بتاعة بالليل دي ما تحطيش منها كتير
كفاية نقطة ورا ودانك وعلي ايديكي لأن ريحتها بتبقي تقيلة شوية

برضه لازم تفرقي بين الحاجات دي
ال perfume وال eau de parfum و eau de toilette و eau de cologn و ال mist

البرفيوم دة بيبقي مركز جدا وتقيل جدا وغالي جدا ونسبة الكحول فيه قليلة وطبعا ثباته عالي جدااااااا ممكن يقعد اكتر من يوم
تحطيه بالليل او في السهرات بس
ال eau de perfume دة الي بعده علي طول البرفيوم فيه تركيزه عالي بس اقل طبعا من الي قبله
وبيبقي ثباته حلو جدا تحطيه برضه بالليل
ال eau de toilette تركيزه اقل والكحول فيه اكتر شوية وثباته حلو ساعتين مثلا او تلاتة عادي ممكن تحطيه الصبح
ال eau de cologn الكحول فيه اكتر دة بتبقي حاجة منعشة كدة تحطيها الصبح وبتبقي خفيفة
ال mist دة بيبقي للجسم والشعر وبيبقي مش مضر خالص لأن مش فيه كحول

لو عايزة تعطري شعرك تعملي ايه ؟؟
ترشي شوية ميست او اي حاجة مش فيها كحول عشان شعرك ما يبيضش علي الفرشاة
مش علي الشعر مباشرة وبعدين تسرحي شعرك

البرفيوم بقي لما تيجي تشيليه عندك
ماتحطيهوش قريب من ضوء الشمس عشان هيبوظ
ولا في الحمام عشان بخار المياة برضه هيبوظه
حطيه علي التسريحة او في الادراج او ممكن في دولابك

يايريت يكون عجبكوا